لاہور:قومی ٹیم کے کپتان بابر اعظم نے زیادہ لسٹ اے سنچریاں سکور کرنے کا سابق جنوبی افریقی کپتان اے بی ڈیویلیرز کا ریکارڈ برابر کردیا ہے ۔ 28 سالہ بابر اعظم نے ایشیا کپ کے پہلے میچ میں نیپال کیخلاف 151 رنز کی شاندار باری کھیلی جو ان کے لسٹ اے کیریئر کی 29 ویں سنچری تھی اور اس کے ساتھ ہی انہوں نے زیادہ لسٹ اے سنچریاں سکور کرنے کا اے بی ڈیویلیئرز کا ریکارڈ برابر کردیا ۔
بابر اعظم اب تک 168 لسٹ اے میچز کی 165 اننگز میں 19 مرتبہ ناٹ آئوٹ رہتے ہوئے 56.63 کی اوسط سے 8269 رنز سکور کرچکے ہیں جس میں 29 سنچریاں اور 46 نصف سنچریاں شامل ہیں ۔ قومی ٹیم کے کپتان اب 29 سنچریوں کے ساتھ سب سے زیادہ لسٹ اے سنچریاں سکور کرنے والے پاکستانی بلے باز ہیں ۔
خرم منظور 27 لسٹ اے سنچریوں کے ساتھ دوسری پوزیشن پر موجود ہیں ۔ قومی ٹیم کے سابق مایہ ناز اوپنر سعید انور 26 سنچریوں کیساتھ تیسری پوزیشن پر براجمان ہیں ۔سابق قومی کپتان سلمان بٹ 24 سنچریوں کے ہمراہ اس فہرست میں چوتھے نمبر پر ہیں ، قومی ٹیم کے سابق وکٹ کیپر بلے باز کامران اکمل نے 21 سنچریوں کے ساتھ 5 ویں پوزیشن سنبھال رکھی ہے ، ایشین بریڈ مین ظہیر عباس 19 سنچریاں سکور کرکے چھٹے جب کہ سابق ٹیسٹ اوپنر سلیم الہی اور فخر زمان 18، 18 سنچریاں سکور کرکے مشترکہ طور پر 7 ویں پوزیشن پر موجود ہیں ۔
سابق ٹی ٹونٹی کپتان محمد حفیظ اور احمد شہزاد 17، 17 سنچریوں کے ساتھ مشترکہ طور پر 8 ویں ، سابق ٹیسٹ کرکٹر اعجاز احمد ، سابق ون ڈے کپتان اظہر علی اور آل رائونڈر شعیب ملک 16،16 سنچریاں سکور کرکے مشتر کہ طور پر 9 ویں جب کہ سابق کپتان محمد یوسف ، رمیز راجہ اور عمران فرحت 15، 15 لسٹ اے سنچریاں سکور کرکے مشترکہ طور پر 10 ویں نمبر پر موجود ہیں۔ قومی ٹیم کے اوپنر شان مسعود 14 لسٹ اے سنچریوں کے ہمراہ اس فہرست میں 11 ویں پوزیشن پر براجمان ہیں۔
