کراچی: ون ڈے ٹیم رینکنگ میں ورلڈ کپ سے قبل نمبر ون کی دوڑ پوری شدت سے جاری ہے۔ون ڈے رینکنگ میں مسلسل تبدیلیاں دیکھنے میں آرہی ہیں، آسٹریلیا نے ٹاپ پوزیشن پر مختصر قیام کیا،اس کے بعد پاکستان نے ایک بار پھر نمبر ون کا اعزاز حاصل کرلیا، گرین شرٹس اگرچہ ایشیا کپ سپر فور راؤنڈ میں بھارت اورپھر سری لنکا سے شکست کھا کر ٹائٹل کی دوڑ سے باہر ہوگئے تھے مگر ماضی کے مثبت نتائج ٹاپ پوزیشن پر دوبارہ کھینچ لائے۔بابرالیون کی جگہ بھارتی ٹیم نمبر ون پوزیشن پرفائز ہوتی اگر اسے سپر فور راؤنڈ میں بنگلہ دیش کے ہاتھوں غیرمتوقع طور پر شکست کا منہ نہ دیکھنا پڑتا، اس ناکامی نے بلو شرٹس کو تیسرے نمبر پر پہنچادیا تھا۔پاکستانی سائیڈ دوسرے نمبر پر پہنچ گئی مگر ابھی رینکنگ کے ٹاپ پر اکھاڑ پچھاڑ ہونا باقی تھی، اس لیے بھارت کے سری لنکا کو شکست دے کر ایشیائی چیمپئن بننے کے باوجود گرین شرٹس کو ٹاپ پر پہنچنے کا موقع مل گیا اس کی وجہ آسٹریلیا کی پانچویں ون ڈے میں جنوبی افریقہ کے ہاتھوں شکست بنی۔کینگروز کو اس سیریز میں2ـ3سے ناکامی کا منہ دیکھنا پڑا تھا، اس شکست نے آسٹریلوی ٹیم کو ون ڈے رینکنگ میں تیسرے نمبر پر پہنچا دیا ، اس کے پوائنٹس کی تعداد بھی اب 113 ہوگئی ہے، اگرچہ پاکستان اور بھارت کے ریٹنگ پوائنٹس کی تعداد ایک جیسی 115 ہی ہے تاہم گرین شرٹس اعشاریائی پوائنٹس کی وجہ سے ٹاپ پر موجود ہیں۔بھارت کے پاس ورلڈ کپ سے قبل ٹاپ پوزیشن پر پہنچنے کا موقع موجود ہے، مقصد کے حصول کیلیے اسے 22 ستمبر سے اپنے ملک میں آسٹریلیا کے خلاف شروع ہونے والی 3 ون ڈے میچز کی سیریز میں کلین سوئپ کرنا ہوگا۔ اس سیریز کا پہلا میچ جمعے کو موہالی میں کھیلا جائے گا، دوسرا 24 ستمبر کو اندور اور تیسرا 26 تاریخ کو راجکوٹ میں شیڈول ہے۔
