ٹریوس ہیڈ کی ویسٹ انڈیز کیخلاف ایڈیلیڈ ٹیسٹ میں کیریئر کی ساتویں سنچری

ایڈیلیڈ:آسٹریلوی کرکٹ ٹیم کے مایہ ناز مڈل آرڈر بلے بازٹریوس ہیڈنے ویسٹ انڈیز کے خلاف شاندار بیٹنگ کا مظاہرہ کرتے ہوئے ٹیسٹ کیریئر کی ساتویں سنچری بنالی۔جمعرات کوایڈیلیڈ اوول، ایڈیلیڈ میں کھیلے جارہے دو میچوں کی سیریز کے ابتدائی ٹیسٹ میچ میں آسٹریلوی ٹیم کے مایہ ناز مڈل آرڈر بلے باز ٹریوس ہیڈ نے پہلی اننگز میں ویسٹ انڈین بائولر ز کی خوب دھلائی کی ،انہوں نے اپنے ٹیسٹ کیریئر کی ساتویں سنچری سکور کرتے ہوئے اپنی ٹیم کی میچ میں پوزیشن بہتر بنادی۔ٹریوس ہیڈ نے اس وقت ٹیم کو سنبھالا دیا جب 113 کے مجموعی سکور پر 4 کینگروز کھلاڑی پویلین لوٹ گئے تھے،ٹریوس نے عمدہ بلے بازی کا مظاہرہ کرتے ہوئے 134گیندوں کا سامنا کرتے ہوئے3خوبصورت چھکوں اور 12چوکوں کی مدد سے انفرادی 119رنز بنائے۔ یہ ٹریوس ہیڈ کے ٹیسٹ کیریئر کی ساتویں سنچری ہے، اس سنچری کے ساتھ ہی ٹریوس ہیڈ نے اپنے ٹیسٹ کیریئر کے 3000 رنز بھی مکمل کرلئے۔ٹریوس ہیڈ کو 119کے انفرادی سکور پر ویسٹ انڈین بائولر الزاری جوزف نے کیویم ہوج کے ہاتھوں کیچ آئوٹ کیا۔